श्रम स्वीकृति खुलेपछि वैदेशिक रोजगारीमा चाप, छोटो समयमै हजारौँ बाहिरिँदै

अञ्जना ढकाल

२ दिन अघि

पाठक संख्या ६६

काठमाडौँ, वैशाख १० - खाडी तथा पश्चिम एसियाका देशमा रोकिएको श्रम स्वीकृति पुनः खुला भएसँगै वैदेशिक रोजगारीमा जानेको संख्या तीव्र रूपमा बढ्न थालेको छ।

पछिल्लो दुई दिनभित्रै ५ हजार ७ सय ३० जनाले श्रम स्वीकृति लिएका छन्। तीमध्ये ३ हजार ४ सय ८३ जना खाडी तथा पश्चिम एसियाका १२ देशतर्फ जाने तयारीमा रहेका छन्।

वैदेशिक श्रम स्वीकृति शाखाका अनुसार बुधबार २ हजार ९ सय ९६ जनाले स्वीकृति लिएका छन् भने मंगलबार २ हजार ७ सय ३४ जनाले श्रम स्वीकृति लिएका थिए।

इजरायल, अमेरिका र इरानबीचको तनावका कारण केही समयअघि श्रम स्वीकृति रोकिएको थियो। परिस्थिति सहज बनेपछि वैशाख ७ गतेदेखि पुनः खुला गरिएको हो।

चालु आर्थिक वर्षको चैत मसान्तसम्म ५ लाख ८७ हजार ३ सय ३२ जनाले श्रम स्वीकृति लिएका छन्, जसमा पुरुषको संख्या बढी देखिएको छ भने महिलाको संख्या तुलनात्मक रूपमा कम रहेको छ।